ពង្រឹងពង្រីក ការអនុវត្តមុខងារតំណាងឱ្យមានគុណភាព តម្លាភាព ប្រសិទ្ធភាព និងគណនេយ្យភាព ក្រុមសមាជិកាព្រឹទ្ធសភា បានរៀបចំពិធីសំណេះសំណាលជាមួយនឹងថ្នាក់ដឹកនាំខេត្ត ក្រុង ស្រុក ព្រមទាំងសមាជិកក្រុមប្រឹក្សាឃុំ សង្កាត់ជាស្រ្តីក្នុងខេត្តកំពង់ធំចំនួន១១៣នាក់ ក្រោមអធិបតីភាពលោកជំទាវ មាន សំអាន ប្រធានក្រុមសមាជិកាព្រឹទ្ធសភា នៅសណ្ឋាគារកំពង់ធំរ៉ូយ៉ាល់ ខេត្តកំពង់ធំ នាព្រឹកថ្ងៃទី០៩ ខែសីហា ឆ្នាំ២០២៤។ ពិធីសំណេះសំណាលនេះ ប្រព្រឹត្តទៅរយៈមួយព្រឹក ដោយមានការចាក់បញ្ចាំខ្សែវីដេអូស្តីពី វឌ្ឍនភាពការងាររបស់ក្រុមសមាជិកាព្រឹទ្ធសភានីតិកាលទី៤ ការធ្វើបទបង្ហាញស្តីពីតួនាទី ភារកិច្ច និងសមត្ថកិច្ចរបស់ក្រុមសមាជិកាព្រឹទ្ធសភា ការចូលរួមមតិយោរបស់សមាជិកក្រុមប្រឹក្សាឃុំ សង្កាត់ជាស្រ្តី ស្តីអំពី៖ទី១-ការអនុវត្តផែនការអភិវឌ្ឍឃុំ សង្កាត់ ដោយផ្តោតលើបញ្ហាពាក់ព័ន្ធទៅនឹងផលប្រយោជន៍សម្រាប់ស្រ្តី និងក្មេងស្រ្តី ទី២-ការគាំទ្រការទំនាក់ទំនង កិច្ចសហការ បញ្ហាប្រឈម និងសំណូមពររបស់សមាជិក្រុមប្រឹក្សាឃុំ សង្កាត់ជាស្រ្តី។ បន្ទាប់មកក្រុមសមាជិកាព្រឹទ្ធសភា បាននាំយកព្រះរាជអំណោយរបស់សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ និងអំណោយរបស់ក្រុមសមាជិកាព្រឹទ្ធសភា រួមាន៖ សារុងចំនួន១៥០ និងកន្សែងចំនួន១១០ កាបូបចំនួន១៨០សម្រាប់ សាប៊ូលាងដៃចំនួន១៨០ និងថវិកាមួយចំនួន សម្រាប់ជូនថ្នាក់ដឹកសមាជិកក្រុមប្រឹក្សាឃុំ សង្កាត់ជាស្រ្តី ព្រមទាំងអ្នកទទួលបន្ទុកកិច្ចការនារី និងកុមារ។
ប្រភព៖ នាយកដ្ឋានព័ត៌មាន
