នាព្រឹកថ្ងៃទី១៩ ខែសីហា ឆ្នាំ២០២៤ ឯកឧត្តម ទេព យុទ្ធី លេខាធិការគណៈកម្មការទី៨ព្រឹទ្ធសភា និងជាសមាជិកក្រុមសមាជិកព្រឹទ្ធសភាប្រចាំភូមិភាគទី៥ បានអញ្ជើញចុះជួបសំណេះសំណាលជាមួយក្រុមប្រឹក្សាក្រុង គណៈអភិបាលក្រុង ក្រុមប្រឹក្សាសង្កាត់កែប ក្រុមប្រឹក្សាសង្កាត់ព្រៃធំ និងក្រុមប្រឹក្សាសង្កាត់អូរក្រសារ ក្រុងកែប ខេត្តកែប។
ថ្លែងនៅក្នុងឱកាសនោះ ឯកឧត្តមបានពាំនាំការផ្ដាំផ្ញើសួរសុខទុកពីសំណាក់សម្ដេចអគ្គមហាសេនាបតីតេជោ ប្រធានព្រឹទ្ធសភា ឯកឧត្តមអនុប្រធានទី១ព្រឹទ្ធសភា និងឯកឧត្តមអនុប្រធានទី២ព្រឹទ្ធសភា ព្រមទាំងបានលើកឡើងអំពីការវិវត្តថ្មីៗ ដោយបានជម្រាបជូនអំពីសាវតា គោលបំណង លទ្ធផលនៃកិច្ចដំណើរការ និងផលប្រយោជន៍ទទួលបានអំពីកិច្ចសហប្រតិបត្តិការអភិវឌ្ឍន៍តំបន់ត្រីកោណកម្ពុជា-ទ្បាវ-វៀតណាម ( CLV DTA ) និងគម្រោងការទុច្ចរិតរបស់ពួកប្រឆាំងជ្រុលនិយមក្រៅប្រទេស។ លើសពីនេះ ក៏បានអំពាវនាវដល់ថ្នាក់ដឹកនាំរដ្ឋបាល និងសមត្ថកិច្ចគ្រប់ថ្នាក់ក្នុងក្រុង ឱ្យបន្តអនុវត្តន៍តួនាទី ភារកិច្ចតាមច្បាប់កំណត់ ជាពិសេសអនុវត្តន៍វិធានការច្បាប់ឱ្យបានតឹងរ៉ឹងបំផុតចំពោះជនអគតិប្រឆាំងជ្រុលនិយម ដែលមានបំណងបំផ្លិចបំផ្លាញសុខសន្តិភាព ស្ថិរភាពសង្គម និងប៉ុនប៉ងផ្ដួលរំលំរាជរដ្ឋាភិបាលស្របច្បាប់ដឹកនាំដោយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងសូមឱ្យព្យាយាមធ្វើការអប់រំប្រជាពលរដ្ឋកុំឱ្យចាញ់ការអូសទាញ បំផុសបំផុល និងការញុះញង់ចូលរួមបង្កចលាចល ឬបាតុកម្មខុសច្បាប់។
