នាព្រឹកថ្ងៃសុក្រ ទី១៣ ខែកញ្ញា ឆ្នាំ២០២៤ នៅសាលាឃុំក្រាំងស្គារ ស្រុកទឹកផុស ខេត្តកំពង់ឆ្នាំង ឯកឧត្តម អ៊ឹង លាងហ៊ួ សមាជិកគណៈកម្មការទី៧ ព្រឹទ្ធសភា និងលោកជំទាវ ថាក់ ឡានី សមាជិកា ក្រុមសមាជិកព្រឹទ្ធសភា ប្រចាំភូមិភាគទី៧ បានអញ្ជើញជួបសំណេះសំណាលជាមួយក្រុមប្រឹក្សាឃុំ ស្មៀន-ជំនួយការស្មៀនឃុំ មេប៉ុស្តិ៍រដ្ឋបាលឃុំក្រាំងស្គារ និងឃុំក្ដុលសែនជ័យ ស្រុកទឹកផុស ខេត្តកំពង់ឆ្នាំង ដោយមានការចូលរួមពីលោកអភិបាលរងស្រុក លោកស្រីសមាជិកាក្រុមប្រឹក្សាស្រុក សរុបចំនួន២៥នាក់ ក្នុងគោលបំណង៖
១-ពាំនាំនូវការផ្ដាំផ្ញើសាកសួរសុខ ទុក្ខ និងថ្លែងអំណរគុណពីសម្ដេចអគ្គមហាសេនាបតីតេជោប្រធានព្រឹទ្ធសភា ឯកឧត្តមអនុប្រធានទី ១ ឯកឧត្តមអនុប្រធានទី២ ព្រឹទ្ធសភា ចំពោះក្រុមប្រឹក្សាឃុំដែលជាអង្គបោះឆ្នោតជ្រើសតាំងសមាជិកព្រឹទ្ធសភា នីតិកាលទី ៥ កន្លងមក។ ២-សិក្សាឈ្វេងយល់ពីវឌ្ឍនភាពការងារ បញ្ហាប្រឈម កង្វល់ ដំ ណោះស្រាយ និងទិសដៅបន្តរបស់ឃុំទាំង២។
៣-ជម្រាបជូនពីសមិទ្ធផល១ឆ្នាំដើមអាណត្តិរបស់រាជរដ្ឋាភិបាលយើង និងតំបន់អភិវឌ្ឍន៍ត្រីកោណ CLV-DTA ។ ចុងបញ្ចប់កម្មវិធី បានឧបត្ថម្ភអាហារសម្រន់ និងថវិកាសម្រាប់សោហ៊ុយធ្វើដំណើរដល់អ្នកចូលរួម និងបានបន្តដំណើរទៅពិនិត្យសាលាឃុំក្រាំងស្គារថ្មី ពិនិត្យសាលាឃុំក្ដុលសែនជ័យ ពិនិត្យរមណីយដ្ឋានទេសចរធម្មជាតិ “ទឹកធ្លាក់ស្រែអំពិល “ក្នុងឃុំក្ដុលសែនជ័យ ដែលគ្រប់គ្រងដោយសហគមន៍ក្នុងមូលដ្ឋាន ។