នាព្រឹកថ្ងៃពុធ ទី១២ ខែមីនា ឆ្នាំ២០២៥ អគ្គលេខាធិការដ្ឋានព្រឹទ្ធសភាបានរៀបចំកិច្ចប្រជុំបូកសរុបលទ្ធផលការងារប្រចាំខែកុម្ភៈ និងកំណត់ទិសដៅការងារខែមីនា ឆ្នាំ២០២៥ ក្រោមអធិបតីភាពឯកឧត្តម ឡាយ សំកុល អគ្គលេខាធិការព្រឹទ្ធសភា នៅសាលសិក្ខាសាលាខាងជើង វិមានព្រឹទ្ធសភា ដោយមានការអញ្ជើញចូលរួមពីថ្នាក់ដឹកនាំអង្គភាពចំណុះអគ្គលេខាធិការដ្ឋានព្រឹទ្ធសភា ចាប់ពីប្រធាននាយកដ្ឋាន។

បន្ទាប់ពីទស្សនាខ្សែវីដេអូបូកសរុបលទ្ធផលការងាររបស់អគ្គលេខាធិការដ្ឋានព្រឹទ្ធសភា ប្រចាំខែកុម្ភៈ និងទិសដៅការងារខែមីនា ឆ្នាំ២០២៥ រួចមក ឯកឧត្តមអគ្គលេខាធិការព្រឹទ្ធសភា បានថ្លែងអំណរគុណដល់ថ្នាក់ដឹកនាំ គ្រប់អង្គភាពទាំងអស់ ដែលបានខិតខំបំពេញការងារជូនស្ថាប័ន ដោយទទួលបានលទ្ធផលប្រកបដោយជោគជ័យ។

បន្ថែមពីនេះ ឯកឧត្តមអគ្គលេខាធិការព្រឹទ្ធសភាបានជម្រាបដល់អង្គភាពពាក់ព័ន្ធ ត្រៀមរៀបចំរៀបចំសមាជព្រឹទ្ធសភា-រដ្ឋសភា បន្តផ្តល់សេវាលើមុខងារតាមដានការអនុវត្តច្បាប់ ត្រៀមរៀបចំរបាយការណ៍ចន្លោះសម័យប្រជុំលើកទី៣ និងត្រៀមផ្តល់សេវាជូនថ្នាក់ដឹកនាំ សមាជិក សមាជិកាព្រឹទ្ធសភាអញ្ជើញចូលរួមក្នុងកម្មវិធីបុណ្យជាតិ និងអញ្ជើញបំពេញទស្សនកិច្ចនៅប្រទេសវៀតណាម ឥណ្ឌូណេស៊ី និងប្រទេសទីម័រឡេស្តេ ចូលរួមមហាសន្និបាត IPU-150 នៅប្រទេសអ៊ូសបេគីស្ថាន ព្រមទាំងត្រៀមទទួលបដិសណ្ឋារកិច្ចគណៈប្រតិភូជាន់ខ្ពស់ប្រទេសរុស្ស៊ី ចិន និងប្រទេសថៃ។ ក្រៅពីនេះ ត្រូវត្រៀមរៀបចំពិធីជួបជុំមន្រ្តីក្នុងឱកាសបុណ្យចូលឆ្នាំ ប្រពៃណីខ្មែរ និងត្រៀមរៀបចំខ្សែវីដេអូសមិទ្ធផលឆ្នាំទី១ នៃព្រឹទ្ធសភានីតិកាលទី៥។

ប្រភព៖ នាយកដ្ឋានព័ត៌មាន