ឯកឧត្តម អ៊ឹង លាងហ៊ួ ជាសមាជិកក្រុមសមាជិកព្រឹទ្ធសភា ប្រចាំភូមិភាគទី៧ បានអញ្ជើញជួបសំណេះសំណាលជាមួយក្រុមប្រឹក្សាឃុំ ស្មៀន ជំនួយការស្មៀន មេប៉ុស្តិ៍រដ្ឋបាល និងប្រធានភូមិ ក្នុងឃុំព្រៃគ្រី ចំនួន១៥នាក់
នាព្រឹកថ្ងៃសុក្រ ទី៩ ខែឧសភា ឆ្នាំ២០២៥ ស្ថិតនៅសាលាឃុំព្រៃគ្រី ស្រុកជនគិរី ខេត្តកំពង់ឆ្នាំង ឯកឧត្តម អ៊ឹង លាងហ៊ួ សមាជិកគណ:កម្មការទី៧ ព្រឹទ្ធសភា និងជាសមាជិកក្រុមសមាជិកព្រឹទ្ធសភា ប្រចាំភូមិភាគទី៧ បានអញ្ជើញជួបសំណេះសំណាលជាមួយក្រុមប្រឹក្សាឃុំ ស្មៀន ជំនួយការស្មៀន មេប៉ុស្តិ៍រដ្ឋបាល និងប្រធានភូមិ ក្នុងឃុំព្រៃគ្រី ចំនួន១៥នាក់ ស្រី៣នាក់ ដើម្បីឈ្វេងយល់ពីវឌ្ឍនភាពការងារនៅក្នុងឃុំរយៈពេលកន្លងមក បញ្ហាប្រឈម និងដំណោះស្រាយ ព្រមទាំងទិសដៅបន្តរបស់ក្រុមប្រឹក្សាឃុំ។ បន្ទាប់ពីបានស្ដាប់របាយការណ៍សង្ខេបរបស់លោកស្រីមេឃុំ និងដោយមានការចូលរួមយោបល់ពីអង្គប្រជុំ ឯកឧត្តម បានសម្ដែងនូវការកោតសរសើរ ចំពោះលទ្ធផលការងារសម្រេចបាននាពេលកន្លងមក ពិសេសការបង្កឱកាសឲ្យប្រជាពលរដ្ឋ បានចូលរួមសប្បាយរីករាយក្នុងសង្ក្រាន្តឆ្នាំថ្មី។ ឯកឧត្តម បានសំណូមពរឲ្យបន្តរក្សាសាមគ្គីភាពផ្ទៃក្នុងឲ្យបានល្អ បន្តខិតខំផ្ដល់សេវាសាធារណៈដល់ប្រជាពលរដ្ឋ បន្តអនុវត្តគោលនយោបាយភូមិ ឃុំ មានសុវត្ថិភាព ឲ្យកាន់តែមានប្រសិទ្ធិភាព បន្តខិតខំដោះស្រាយសំណូមពរ និងតម្រូវការរបស់ប្រជាពលរដ្ឋ ព្រមទាំងសកម្មជម្រុញការចុះឈ្មោះបោះឆ្នោតឲ្យទទួលបានលទ្ធផលល្អ។ ចុងក្រោយឯកឧត្តមបានឧបត្ថម្ភថវិកាមួយចំនួន ជាសោហ៊ុយដល់អ្នកចូលរួម ថវិកាជួយគាំទ្រដល់ដំណើរការចុះឈ្មោះបោះឆ្នោតក្នុងឃុំ ថវិកាមូលនិធីសង្គហធម៌ឃុំ និងថវិកាចូលរួមជួយកសាងជណ្ដើរឡើងភ្នំ។
