ថ្ងៃទី០៦ ខែមិថុនា ឆ្នាំ២០២៥ លោកជំទាវ មុំ សណ្តាប់ សមាជិកាគណៈកម្មការទី៦ព្រឹទ្ធសភា និងជាសមាជិកាក្រុមសមាជិកព្រឹទ្ធសភាប្រចាំភូមិភាគទី១ បានអញ្ជើញចូលរួមជាគណៈអធិបតី ក្នុងពិធីសំណេះសំណាលជាមួយកុមារចំនួន ៣០០នាក់ មកពីគ្រួសារដែលមានជីវភាពលំបាក ដើម្បីអបអរខួបលើកទី៧៦ ទិវាកុមារអន្តរជាតិ ១មិថុនា និងទិវាកុមារកម្ពុជាឆ្នាំ២០២៥ ដោយមានការចូលរួមពីសមាជិក សមាជិកា គ.ក.ស.ក នៃរដ្ឋបាលរាជធានីភ្នំពេញ, គ.ក.ស.ក នៃរដ្ឋបាលខណ្ឌជ្រោយចង្វារ, គ.ក.ន.ក សង្កាត់កោះដាច់។
ក្នុងឱកាសនោះកុមារចំនួន ៣០០នាក់ ទទួលបានអំណោយឧបត្ថម្ភពី ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ នូវសម្ភារៈសិក្សាមួយចំនួន និងថវិកា ១០,០០០រៀល ក្នុងមួយនាក់ ។ នៅក្នុងនោះដែរ លោកជំទាវ មុំ សណ្តាប់ បានឧបត្ថម្ភជាថវិកាចំនួន ៤០០,០០០រៀល, និងលោកជំទាវ តិមា វិចិ្ឆកាល អភិបាលរងរាជធានីភ្នំពេញ ក៏បានឧបត្ថម្ភ ជាទឹកដោះគោស្រស់ ជូនដល់កុមារ និងបាននាំយកសម្ភារៈជាទេយ្យទាន និងបច្ច័យមួយចំនួនប្រគេនដល់ព្រះចៅអធិការវត្តឥន្ទពិសីផងដែរ ។
ពិធីសំណេះសំណាលនេះ ប្រព្រឹត្តទៅនៅសង្កាត់កោះដាច់ ខណ្ឌជ្រោយចង្វារ រាជធានីភ្នំពេញ។
