នាព្រឹកថ្ងៃទី៧ ខែសីហា ឆ្នាំ២០២៥ លោកជំទាវបណ្ឌិត ចាន់ សុទ្ធាវី ប្រធានគណៈកម្មការនីតិកម្ម និងយុត្តិធម៌នៃព្រឹទ្ធសភា និងជាប្រធានក្រុមការងារចលនាស្ត្រី និងកិច្ចការច្បាប់ក្រុងសំពៅពូន បានអញ្ជើញជួបសំណេះសំណាល សួរសុខទុក្ខបងប្អូនប្រជាពលរដ្ឋដែលបានវិលត្រឡប់មកពីប្រទេសថៃ នៅសង្កាត់ជ្រោយតាកែវ ក្រុងសំពៅពូន ខេត្តកណ្តាល ដោយមានការអញ្ជើញចូលរួមពី លោកជំទាវ សួស សារ៉ាម សមាជិកាព្រឹទ្ធសភា ឯកឧត្តម លោកជំទាវ លោក លោកស្រី ជាអនុប្រធាន និងសមាជិក សមាជិកានៃក្រុមការងារចលនាស្ត្រី និងកិច្ចការច្បាប់ក្រុងសំពៅពូន។ក្នុងឱកាសនោះដែរ លោកជំទាវបណ្ឌិត បានពាំនាំនូវការផ្ដាំផ្ញើការសាកសួរសុខទុក្ខពីសំណាក់ សម្តេចអគ្គមហាសេនាបតីតេជោ ប្រធានព្រឹទ្ធសភា ឯកឧត្តមអនុប្រធានទី១ ព្រឹទ្ធសភា និងឯកឧត្តមបណ្ឌិតអនុប្រធានទី២ ព្រឹទ្ធសភា ព្រមទាំងបានថ្លែងអំណរគុណ នូវស្មារតីសាមគ្គីភាពខ្ពស់របស់បងប្អូនប្រជាពលរដ្ឋក្នុងមូលដ្ឋាន និងឆន្ទៈគាំទ្រ ជឿជាក់លើថ្នាក់ដឹកនាំ រាជរដ្ឋាភិបាល និងវីរកងទ័ពជួរមុខ។នៅក្នុងជំនួបនោះ លោកជំទាវបណ្ឌិត និងក្រុមការងារ បានផ្តល់មតិយោបល់ ជួយសម្របសម្រួល និងជួយដោះស្រាយទាក់ទងនឹងការផ្តល់សេវាផ្សេងៗ ជូនបងប្អូនប្រជាពលរដ្ឋដែលបានវិលត្រឡប់មកពីប្រទេសថៃ ដូចជា៖ +ការជួយសម្របសម្រួល ដើម្បីរកសាលារៀនឱ្យកូនចៅរបស់ពលករទាំងនោះបានបន្តការសិក្សាជាបន្តទៀត +ជួយរកការងារនៅក្នុងប្រទេសកម្ពុជា ជូនដល់បងប្អូនពលករ ក្រោយពីបានវិលត្រលប់មកពីប្រទេសថៃ +ជួយសម្របសម្រួលធ្វើអត្តសញ្ញាណប័ណ្ណជូនបងប្អូនពលករ ដែលមានអត្តសញ្ញាណប័ណ្ណហួសសុពលភាព ឬបាត់ ឬខូច ឬទើបគ្រប់អាយុធ្វើអត្តសញ្ញាណប័ណ្ណ។ក្រោយពីបានសំណេះសំណាល លោកជំទាវបណ្ឌិត និងក្រុមការងារ ក៏បានជួយឧបត្ថម្ភសម្ភារៈ និងថវិកាផ្ទាល់ខ្លួនមួយចំនួន ជូនដល់បងប្អូនប្រជាពលរដ្ឋ នៅសង្កាត់ជ្រោយតាកែវ ក្រុងសំពៅពូន ខេត្តកណ្តាល ដែលបានវិលត្រលប់ពីប្រទេសថៃវិញ ។
ប្រភព៖ ការិយាល័យជំនួយការគណៈកម្មការទី៦ព្រឹទ្ធសភា
