នៅថ្ងៃទី២៩ ខែសីហា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា បានដឹកនាំគណៈប្រតិភូព្រឹទ្ធសភា និងតំណាងសភាពាណិជ្ជកម្មបរទេសមួយចំនួនរួមមានសភាពាណិជ្ជកម្មអាម៉េរិក អឺរ៉ុប អូស្រ្តាលី ឥណ្ឌា ហ្វ៊ីលីពីន សិង្ហបុរី និងក្រុមហ៊ុនឯកជនមួយចំនួនទៀត ជួបជាមួយ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ និង ឯកឧត្តម ឌិត ទីណា រដ្ឋមន្រ្ដីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានជួយខេត្តបន្ទាយមានជ័យ ស្វែងយល់អំពីភូមិសាស្រ្ដ និងស្ថានភាពភូមិជោគជ័យ និងភូមិព្រៃចាន់ ស្ថិតនៅឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ជាទីកន្លែងដែលកងទ័ពថៃបានបណ្ដេញប្រជាជនកម្ពុជាចំនួន១២គ្រួសារពីផ្ទះ និងបានព័ទ្ធបន្លាលួសជុំវិញភូមិស្ថានរបស់ពួកគាត់ កាលពីថ្ងៃទី១២ និងថ្ងៃទី១៣ ខែសីហា ឆ្នាំ២០២៥
កម្ពុជា បានបង្ហាញនូវការអត់ធ្មត់ និងភាពចាស់ទុំ ក្នុងការដោះស្រាយជម្លោះព្រំដែនជាមួយថៃ។ ក្នុងពេលជាមួយគ្នានេះដែរ អាជ្ញាធរ ក៏បានជួយអ្នកភូមិ បំពេញសេចក្តីខ្វះខាតនានា និងយកចិត្តទុកដាក់លើបញ្ហាសុវត្ថិភាព និងសុខភាពរបស់ពលរដ្ឋតាមព្រំដែន។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
