ក្នុងឱកាសជួបសំណេះសំណាលនិងផ្សព្វផ្សាយអំពីសភាពការណ៍កម្ពុជា ជូនដល់មន្រ្តីរាជការ ប្រជាពលរដ្ឋ ក្នុងស្រុកស្រីសន្ធរ ខេត្តកំពង់ចាម ចំនួន២៧៧នាក់ នារសៀលថ្ងៃទី៣០ ខែកញ្ញា ឆ្នាំ២០២៥ ឯកឧត្តម អ៊ុច បូររិទ្ធ ប្រធានស្តីទីព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគទី២ (ខេត្តកំពង់ចាម និងខេត្តត្បូងឃ្មុំ) បានអំពាវនាវឱ្យបងប្អូនប្រជាពលរដ្ឋនៅគ្រប់ស្រទាប់វណ្ណៈទាំងអស់ បន្តលើកកម្ពស់ស្មារតីសាមគ្គីភាព ឯកភាពជាតិរួមគ្នាជាធ្លុងមួយជុំវិញសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងរាជរដ្ឋាភិបាល ពួតដៃជាមួយវីរៈកងទ័ពខ្មែរ នៅក្នុងការប្តូរផ្តាច់ការពារដែនអធិបតេយ្យរបស់កម្ពុជា ប្រឆាំងនិងវាយបំបាក់អំពើឈ្លានពានពីសំណាក់ប្រទេសថៃ។ក្នុងឱកាសនោះ ឯកឧត្តមប្រធានក្រុមភូមិភាគទី២ បាននាំប្រសាសន៍ផ្តាំផ្ញើសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត និងបានគូសបញ្ជាក់អំពីមូលហេតុ និងសភាពការណ៍វិវត្តថ្មីៗ នៃការឈ្លានពានយ៉ាងគឃ្លើនរបស់ប្រទេសថៃ មកលើទឹកដីកម្ពុជា ដែលមានតាំងពីយូរណាស់មកហើយរហូតមកដល់បច្ចុប្បន្ននេះ។ឯកឧត្តមប្រធានក្រុមភូមិភាគទី២ បានធ្វើការកត់សម្គាល់ប្រកបដោយមោទនភាពជាតិខ្ពស់ និងក្តីរំភើបជាអតិបរិមា ចំពោះស្មារតីស្នេហារជាតិមាតុភូមិ និងសាមគ្គីឯកភាពជាតិជាធ្លុងមួយរបស់បងប្អូនប្រជាពលរដ្ឋគ្រប់ស្រទាប់វណ្ណៈនៅទូទាំងប្រទេស ក្នុងការចូលរួមឧបត្ថម្ភ គាំទ្រទាំងកម្លាំងកាយ ចិត្ត និងសម្ភារៈ ជួយដល់វីរៈយុទ្ធជនដែលកំពុងក្រាញននៀលនៅសមរភូមិ តស៊ូ បូជាសាច់ស្រស់ ឈាមស្រស់ ការពាទឹកដីមាតុភូមិកម្ពុជា។
ប្រភព៖ នាយកដ្ឋានព័ត៌មាន
