ដោយព្រះរាជហឫទ័យព្រួយបារម្ភដល់យុទ្ធជន យុទ្ធនារីនៅតាមព្រំដែន និងប្រជានុរាស្រ្តដែលកំពុង ជួបទុក្ខលំបាក សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល បានសព្វព្រះរាជហឫទ័យប្រោសប្រទាន ឱ្យសម្តេចរាជបុត្រីព្រះអនុជ នរោត្តម អរុណរស្មី សមាជិកាព្រឹទ្ធសភា ជាព្រះរាជតំណាងដ៏ខ្ពង់ខ្ពង់ នាំយកព្រះរាជអំណោយរួមមាន៖ ថ្នាំបាញ់ការពារមូសខាំចំនួន២០០ដប ថ្នាំលាបរបួសចំនួន៦០ប្រអប់ និងថ្នាំជំនួយផ្លូវដង្ហើមចំនួន១០០ប្រអប់ ប្រោសប្រទានជូនលោកជំទាវ មាន សំអាន ប្រធានក្រុមសមាជិកាព្រឹទ្ធសភា នៅបន្ទប់ប្រជុំគណៈកម្មការទី៨ព្រឹទ្ធសភា នាព្រឹកថ្ងៃចន្ទ ទី១៣ ខែតុលា ឆ្នាំ២០២៥ ដើម្បីចែកជូនវីរកងទ័ពការពារព្រំដែន និងប្រជានុរាស្រ្តភៀសសឹក នៅតំបន់រងគ្រោះដោយការឈ្លានពានរបស់ក្រុមទាហានថៃ និងអ្នកនយោបាយថៃមួយចំនួនតូច។

ក្នុងឱកាសនោះ លោកជំទាវ មាន សំអាន បានថ្លែងអំណរព្រះមហាករុណាទិគុណជាអនេកប្បការ ថ្វាយសម្តេចព្រះមហាក្សត្រី ព្រះវររាជមាតាជាតិខ្មែរ ដែលបានសព្វព្រះរាជហឫទ័យប្រោសព្រះរាជទានព្រះរាជអំណោយដ៏ថ្លៃថ្លា សូមព្រះអង្គប្រកបដោយព្រះពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ ដើម្បីគង់ប្រថាប់ជាមហាម្លប់ដ៏ត្រជាក់សម្រាប់ជាតិ មាតុភូមិ និងប្រជានុរាស្រ្តជាកូនចៅ ចៅទួតរបស់ព្រះអង្គបាន ជ្រកកោនជាដរាបតទៅ៕

ខ្លឹមសារ៖ ការិយាល័យអមក្រុមសមាជិកាព្រឹទ្ធសភា
រូបភាព៖ នាយកដ្ឋានព័ត៌មាន