នាថ្ងៃព្រហស្បតិ៍ ៥រោច ខែបុស្ស ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៨ ខែមករា ឆ្នាំ២០២៦ គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃព្រឹទ្ធសភា និងក្រុមសមាជិកាព្រឹទ្ធសភា ដឹកនាំដោយលោកជំទាវ មាន សំអាន ប្រធានគណៈកម្មការ និងជាប្រធានក្រុម បានអញ្ជើញចុះសួរសុខទុក្ខ ព្រមទាំងនាំយកគ្រឿង ឧបភោគ បរិភោគ សម្ភារប្រើប្រាស់ និងថវិកា ចែកជូនវីរកងទ័ព ដែលកំពុងសម្រាកព្យាបាលនៅមណ្ឌលសុខភាពគូលែន ស្រុកគូលែន និងមន្ទីរពេទ្យបង្អែកខេត្ត ១៦មករា ក្រុងព្រះវិហារ ខេត្តព្រះវិហារ។
លោកជំទាវប្រធានគណៈប្រតិភូ បាននាំយកនូវប្រសាសន៍ផ្ដាំផ្ញើសួរសុខទុក្ខប្រកបដោយក្តីបារម្ភ និងការយកចិត្តទុក្ខដាក់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចកិត្តិសង្គហបណ្ឌិត ម៉ែន សំអន ជូនចំពោះវីរកងទ័ពទាំងអស់ដែលកំពុងសម្រាកទទួលការព្យាបាល។
ក្នុងឱកាសទិវាអបអរសាទរខួបទី៤៧ នៃទិវាជ័យជម្នះ ៧មករា ថ្ងៃកំណេីតទី២ របស់យេីងទាំងអស់គ្នា លោកជំទាវប្រធាន បានរំលឹកការចងចាំនូវវីរភាពដ៏អង់អាចក្លាហាន តស៊ូ និងលះបង់គ្រប់បែបយ៉ាងរបស់យុទ្ធជនដែលបានពលីជីវិត ដេីម្បីរំដោះប្រទេសពីរណ្តៅមរណ:នៃរបបដ៏ខ្មៅងងឹត ៣ឆ្នាំ ៨ខែ ២០ថ្ងៃ ជាវាលពិឃាតមកកម្ពុជាពោរពេញដោយសន្តិភាព និងការអភិវឌ្ឍ។
ជាងនេះទៀត លោកជំទាវប្រធាន បានថ្លែងអំណរគុណចំពោះក្រុមគ្រូពេទ្យ និងសម្តែងនូវការកោតសរសើរចំពោះវីរភាពដ៏អង់អាចក្លាហានរបស់វីរកងទ័ពកម្ពុជា ឈរជើងការពារជាតិមាតុភូមិ និងការលះបង់គ្រប់បែបយ៉ាង ដើម្បីការពារបូរណភាពទឹកដីពីការឈ្លានពានរបស់សៀម ព្រមទាំងជូនពរឱ្យបងប្អូនវីរកងទ័ពទាំងអស់ឆាប់បានជាសះស្បើយពីរបួស និងជំងឺ បានវិលត្រឡប់ទៅជួបជុំវីរយុទ្ធមិត្តនៅអង្គភាព និងក្រុមគ្រួសារនៅលំនៅដ្ឋានវិញ។
រួមជាមួយសម្ភារ ម្ហូបអាហារ ថវិកា ដែលបានចែកជូនបងប្អូនវីរកងទ័ពគ្រប់ៗរូបកំពុងសម្រាកព្យាបាល និងក្រុមគ្រូពេទ្យលោកជំទាវប្រធានក៏បានឧបត្ថម្ភថវិកាមួយចំនួនបន្ថែមជូនមណ្ឌលសុខភាពគូលែន និងមន្ទីរពេទ្យបង្អែកខេត្ត ១៦មករា ខេត្តព្រះវិហារ សម្រាប់ប្រើប្រាស់ផងដែរ។
ប្រភព៖ នាយកដ្ឋានព័ត៌មាន
