ឯកឧត្តម ស្លេះ ពុនយ៉ាមុីន សមាជិកព្រឹទ្ធសភា អញ្ជើញមានមតិសំណេះសំណាលនៅវិហារជើមៀក ក្រុងកំពង់ចាម នាព្រឹកថ្ងៃទី៣១ ខែមីនា ឆ្នាំ២០២៥ ដែលជាថ្ងៃចេញបួសនៃសាសនាអុីស្លាមទូទាំងកម្ពុជា ក៏ដូចជាពិភពលោក ។

ឯកឧត្តមបានសុំការអភ័យទោសទៅចំពោះបងប្អូនសាសនិកអុីស្លាមទាំងអស់ដែលមកថ្វាយបង្គំ ឱ្យអភ័យទោសដល់ឯកឧត្តមនិងគណ:កម្មការគ្រប់គ្រងវិហារ ហាកឹម តួន ដែលបានដឹកនាំរយ:ពេលមួយឆ្នាំកន្លងមក នូវរាល់កំហុសខុសឆ្គងទាំងឡាយ ពាក្យសម្តី កាយវិការមិនសមរម្យទៅលើបងប្អូនទាំងអស់ ។

ឯកឧត្តមក៏បានបញ្ជាក់បន្ថែមទៀតដែរថា ពេលដែលយើងកំពុងតែថ្វាយបង្គំនៅក្នុងវិហារដ៏ស្រស់ស្អាតមួយនេះ ស្របពេលបងប្អូនអុីស្លាម នៅលើពិភពលោកមួយចំនួនស្រាយបួសដូចយើងដែរ ប៉ុន្តែគ្មានពេលថ្វាយបង្គំ គ្មានកន្លែងថ្វាយបង្គំក៏ព្រោះតែប្រទេសគ្មានសន្តិភាព កំពុងរងគ្រោះដោយសារសង្គ្រាម សូម្បីតែម្ហូបអារហារក៏គ្មានបរិភោគដូចយើងពេលនេះដែរ។ ទាំងនេះហើយដែលយើងគួរនឹកដល់សន្តិភាព នឹកដល់ស្ថាបនិកសន្តិភាព និងអ្នកការពារសន្តិភាពសម្រាប់យើងទាំងអស់គ្នា ។ ការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ដែលមានសម្តេចតេជោប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត ដ៏ឈ្លាសវៃនាយករដ្ឋមន្ត្រីនៃកម្ពុជា ។ ដូច្នេះហើយយើងទាំងអស់ត្រូវបេជ្ញាដាច់ខាតក្នុងការការពារសន្តិភាព និងអភិវឌ្ឍប្រទេសយើងឱ្យកាន់តែមានភាពរីកចម្រើនជានិច្ច។