ឯកឧត្ដម អ៊ុច បូររិទ្ធ អនុប្រធានទី២ព្រឹទ្ធសភា បានអញ្ជើញជាអធិបតីភាពក្នុងពិធីចុះហត្ថលេខាលើអនុស្សរណៈនៃការយោគយល់គ្នារវាងគណៈកម្មការអង្កេត បោសសម្អាត និងប្រឆាំងអំពើពុករលួយ នៃព្រឹទ្ធសភា (គណៈកម្មការទី១០) ជាមួយនឹងមូលនិធិចែករំលែកសង្គ្រោះជីវិតសកល នៃសាធារណៈកូរ៉េ ស្តីពីកិច្ចព្រមព្រៀងផ្តល់មនុស្សធម៌ដល់ព្រឹទ្ធសភាកម្ពុជា នៅសាលពិសេស៣ វិមានព្រឹទ្ធសភា នាព្រឹកថ្ងៃទី០៥ ខែមិថុនា ឆ្នាំ២០២៤។
អនុស្សរណៈយោគយល់គ្នានេះ ត្រូវបានចុះហត្ថលេខាដោយឯកឧត្តម ម៉ម ប៊ុននាង ប្រធានគណៈកម្មការទី១០ព្រឹទ្ធសភា និងលោក Kim Jung Nam ប្រធានមូលនិធិចែករំលែកសង្រ្គោះជីវិតសកល នៃសាធារណរដ្ឋកូរ៉េ ។
អនុស្សរណៈនៃការយោគយល់គ្នានេះ រៀបចំឡើងដើម្បីបន្តអនុស្សរណៈដែលបានព្រមព្រៀងគ្នាកាលពីថ្ងៃទី០៤ ខែសីហា ឆ្នាំ២០២២ ក្នុងគោលបំណងកែសម្រួលឱ្យកាន់តែល្អ និងសម្រេចឱ្យបាននូវជីវភាពរស់នៅរបស់ប្រជាជនកម្ពុជាប្រកបដោយគុណភាព ជាពិសេសផ្នែកសុខភាព ការអប់រំ និងសុខុមាលភាព តាមរយៈការផ្តល់ជំនួយជាសម្ភារៈវេជ្ជសាស្រ្តរួមមាន៖ ឱសថ ឧបករណ៍វេជ្ជសាស្ត្រ និងសម្ភារៈប្រើបា្រស់ប្រចាំថ្ងៃ៕

ប្រភព៖ នាយកដ្ឋានព័ត៌មាន