នៅព្រឹកថ្ងៃអង្គារ ទី៨ ខែមេសា ឆ្នាំ២០២៥ ឯកឧត្តម អ៊ុច បូររិទ្ធ អនុប្រធានទី១ ព្រឹទ្ធសភា និងជាប្រធានគណៈប្រតិភូសភា (ព្រឹទ្ធសភានិងរដ្ឋសភា) នៃព្រះរាជាណាចក្រកម្ពុជា បានអញ្ជើញចូលរួមថ្លែងបទអន្តរាគមន៍ នៅក្នុងកិច្ចពិភាក្សាទូទៅនៃមហាសន្និបាតលើកទី១៥០ នៃសហភាពអន្តរសភា (IPU-150) ក្រោមមូលបទ៖ “សកម្មភាពសភា ដើម្បីការអភិវឌ្ឍសង្គម និងយុត្តិធម៌ (Parliamentary action for social development and justice)“ នៅទីក្រុងតាស្កិន ប្រទេសអ៊ូសបេគីស្តង់។

ថ្លែងនៅក្នុងឱកាសនោះ ឯកឧត្តមប្រធានគណៈប្រតិភូបានផ្តោតសំខាន់លើចំណុចគន្លឹះ ​ដែលមានលក្ខណៈបន្ទាន់ ក្នុងការរួមចំណែកដល់ការកសាងអនាគតមួយពួនជ្រុំដោយសមធម៌ និងសេចក្តីថ្លៃថ្នូរបស់មនុស្សជាតិ តាមរយៈសកម្មភាពរបស់សភា​​ ដោយបានគូសបញ្ជាក់ពីការអភិវឌ្ឍសង្គម មិនមែនមានត្រឹមតែជាសូចនាករសេដ្ឋកិច្ច តែរួមបញ្ចូលផងដែរនូវសមភាពក្នុងការទទួលបានការអប់រំ ការថែទាំសុខភាព ការងារសមរម្យ និងកិច្ចគាំពារសង្គមគ្រប់ជ្រុងជ្រោយ។ នៅចំពោះមុខនៃការកើនឡើងនៃវិសមភាព និងភាពមិនប្រាកដប្រជានៃភូមិសាស្ត្រនយោបាយ ឯកឧត្តមអនុប្រធានទី១ ព្រឹទ្ធសភា បានលើកឡើងថា សភាគួរដើរតួនាទីនាំមុខក្នុងការតាក់តែងគោលនយោបាយនានាប្រកបដោយបរិយាបន្ន ដែលលើកកម្ពស់យុត្តិធម៌ និងពង្រឹងការអភិវឌ្ឍសង្គម។

ទន្ទឹមនឹងវាយតម្លៃខ្ពស់ចំពោះគុណតម្លៃសន្តិភាព ឯកឧត្តមប្រធានគណៈប្រតិភូបានអះអាងពីការប្ដេជ្ញាចិត្តរបស់កម្ពុជា ក្នុងការចូលរួមសហការយ៉ាងខ្ជាប់ខ្ជួនជាមួយបណ្តាប្រទេសដែលស្រឡាញ់សន្តិភាព សំដៅគាំទ្រដល់កិច្ចខិតខំប្រឹងប្រែងកសាង​និង​រក្សាសន្តិភាពអន្តរជាតិ ជាពិសេសតាមរយៈការបញ្ជូនកងទ័ពមួកខៀវជាង១ម៉ឺននាក់ ចាប់តាំងពីឆ្នាំ២០០៦ ដើម្បីចូលរួមក្នុងប្រតិបត្តិការរក្សាសន្តិភាពក្រោមឆ័ត្រអង្គការសហប្រជាជាតិ នៅក្នុងបណ្តាប្រទេសមួយចំនួន នៅក្នុងពិភពលោក។ ទន្ទឹមនឹងនេះ កិច្ចប្រជុំពេញអង្គលើកទី១១ នៃសភាអន្តរជាតិការសម្រាប់ការអត់ឱន និងសន្តិភាព ដែលបានប្រព្រឹត្តទៅនៅកម្ពុជា កាលពីខែវិច្ឆិកា ឆ្នាំ២០២៤ ដែលនៅក្នុងឱកាសនោះ កម្ពុជាបានដាក់ចេញនូវធម្មនុញ្ញសន្តិភាពសកល ដែលជាគំនិតផ្តួចផ្តើមដ៏ថ្លៃថ្លារបស់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ជាសក្ខីកម្មបញ្ជាក់ពីការប្ដេជ្ញាចិត្តរបស់កម្ពុជា ចំពោះកិច្ចសន្ទនា, ការយោគយល់គ្នាទៅវិញទៅមក និងកិច្ចសហប្រតិបត្តិការសកល។ ស្តីពីការអភិវឌ្ឍសង្គម ជាមួយនឹងការលើកឡើងពីការទទួលយកទាំងស្រុងរបស់កម្ពុជា​នូវរបៀបវារៈឆ្នាំ២០៣០ ឯកឧត្តមបានគូសបញ្ជាក់ពីការកំណត់គោលដៅអភិវឌ្ឍន៍ប្រកបដោយចីរភាពរបស់កម្ពុជា ដោយរួមបញ្ចូលគោលដៅលើការបោសសម្អាតមីន ដែលរហូតមកដល់ពេលបច្ចុប្បន្ន កម្ពុជាបានបោសសម្អាតចំការមីនបានជាង ៣,០០០គីឡូម៉ែត្រការ៉េ។ ដីដែលធ្លាប់បង្កគ្រោះថ្នាក់ ឥឡូវនេះបានជួយគាំទ្រដល់កសិកម្ម ការសាងសង់ហេដ្ឋារចនាសម្ព័ន្ធ និងជីវភាពរស់នៅ – ស្រោចស្រង់មនុស្សរាប់លាននាក់ឱ្យចេញពីភាពក្រីក្រ៕

ប្រភព៖ ខុទ្ទកាល័យឯកឧត្តមអនុប្រធានទី១ ព្រឹទ្ធសភា