នាព្រឹកថ្ងៃទី២៤ ខែឧសភា ឆ្នាំ២០២៥ គណៈប្រតិភូព្រឹទ្ធសភា នៃព្រះរាជាណាចក្រកម្ពុជា ដឹកនាំដោយឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា បានអញ្ជើញគោរពវិញ្ញាណក្ខន្ធឯកឧត្តម ជិន ឌឹក លឿង (TRAN DUC LUONG) អតីតសមាជិកការិយាល័យនយោបាយនៃបក្សកុម្មុយនិស្តវៀតណាម និងជាអតីតប្រធានរដ្ឋនៃសាធារណរដ្ឋសង្គមនិយមវៀតណាម នៅស្ថានទូតសាធារណរដ្ឋសង្គមនិយមវៀតណាម ប្រចាំកម្ពុជា។
ក្នុងនាមព្រឹទ្ធសភា នៃព្រះរាជាណាចក្រកម្ពុជា ក្នុងនាមថ្នាក់ដឹកនាំ និងមន្ត្រីរាជការនៃអគ្គលេខាធិការដ្ឋានព្រឹទ្ធសភា និងឯកឧត្តមបណ្ឌិតផ្ទាល់ ឯកឧត្តមបណ្ឌិតសូមចូលរួមរំលែកទុក្ខដោយមនោសញ្ចេតនាក្តុកក្តួលក្រៀមក្រំជាទីបំផុតជាមួយគ្រួសារសពក៏ដូចជារដ្ឋសភា រដ្ឋាភិបាល និងប្រជាជននៃសាធារណរដ្ឋសង្គមនិយមវៀតណាម គឺជាការបាត់បង់រដ្ឋបុរសដ៏ឆ្នើមមួយរូប ដែលបានធ្វើពលិកម្មពេញមួយជីវិត ដើម្បីបម្រើជាតិនិងប្រជាជនវៀតណាម។ ឯកឧត្តមជាថ្នាក់ដឹកនាំដ៏មានសមត្ថភាព និងជាមិត្តដ៏ល្អរបស់កម្ពុជា ដោយបានរួមចំណែកយ៉ាងសំខាន់ក្នុងការលើកកម្ពស់ទំនាក់ទំនងកិច្ចសហប្រតិបត្តិការ និងរឹតចំណងមិត្តភាពរវាងរដ្ឋាភិបាលនិងប្រជាជន នៃប្រទេសទាំងពីរ។
គួររម្លឹកដែរថា ឯកឧត្តម ជិន ឌឹក លឿង បានទទួលមរណភាពកាលពីថ្ងៃទី២០ ខែឧសភា ឆ្នាំ២០២៥ វេលាម៉ោង២២:៥១នាទី ដោយរោគគាពាធ។
ប្រភព៖ នាយកដ្ឋានព័ត៌មាន
