នាព្រឹកថ្ងៃចន្ទ ១១កើត ខែមិគសិរ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១ ខែធ្នូ ឆ្នាំ២០២៥ ឯកឧត្តម អ៊ុច បូររិទ្ធ ប្រធានស្តីទីព្រឹទ្ធសភា បានដឹកនាំគណៈប្រតិភូព្រឹទ្ធសភា អញ្ជើញគោរពវិញ្ញាណក្ខន្ធសពឯកឧត្តមសាស្ត្រាចារ្យ ហេង តៃគ្រី រដ្ឋលេខាធិការក្រសួងសុខាភិបាល និងជាអតីតប្រធានមន្ទីរពេទ្យកាល់ម៉ែត ដែលបានទទួលអនិច្ចកម្ម កាលពីថ្ងៃអាទិត្យ ទី៣០ ខែវិច្ឆិកា ឆ្នាំ២០២៥ វេលាម៉ោង ១២:១០នាទីរំលងអធ្រាត្រ ក្នុងជន្មាយុ ៧៧ឆ្នាំ ដោយរោគាពាធ។
ក្នុងបរិយាកាសពោរពេញទៅដោយទុក្ខដ៏ក្រៀមក្រំ និងសោកសង្រេងនេះ ឯកឧត្តមប្រធានស្តីទីព្រឹទ្ធសភា បានធ្វើអភិវន្ទកិច្ចចូលរួមរំលែកមរណៈទុក្ខ និងសោកស្តាយជាពន់ពេកជាមួយក្រុមគ្រួសារ ចំពោះមរណភាពរបស់ឯកឧត្តមសាស្ត្រាចារ្យ ហេង តៃគ្រី គឺជាការបាត់បង់ស្វាមី លោកឪពុក ឪពុកក្មេក ជីតា ជាទីគោរពស្រឡាញ់ប្រកបដោយព្រហ្មវិហារធម៌ ហើយឯកឧត្តមសាស្ត្រាចារ្យ បានយកអស់កម្លាំងកាយ ចិត្ត ប្រាជ្ញា ស្មារតី ក្មុងការបម្រើប្រទេសជាតិ និងប្រជាជន ប្រកបដោយការទទួលខុសត្រូវខ្ពស់កសាងស្នាដៃនិងសមិទ្ធផលជាច្រើន រួមចំណែកជាមួយរដ្ឋាភិបាលក្នុងការស្តារនិងអភិវឌ្ឍប្រទេសជាតិឱ្យមានការរីកចម្រើនលើកគ្រប់វិស័យ ជាពិសេសក្នុងការលើកស្ទួយវិស័យសុខាភិបាល តាមរយៈការអភិវឌ្ឍធនធានមនុស្ស និងទំនើបកម្មវិទ្យាសាស្ត្រ និងបច្ចេកវិទ្យាក្នុងវិស័យសុខាភិបាល លើកកម្ពស់សុខុមាលភាព សេវា ការព្យាបាល និងសង្គ្រោះអាយុជីវិតប្រជាជន។ សូមបួងសួងឧទ្ទិសដល់គុណព្រះរតនត្រៃយ និងវត្ថុស័ក្តិសិទ្ធិក្នុងលោក សូមតាមថែរក្សាដល់ដួងវិញ្ញាណក្ខន្ធឯកឧត្តមសាស្ត្រាចារ្យ ហេង តៃគ្រី បានចាប់បដិសន្ធិក្នុងសុគតិភព កុំបីឃ្លៀងឃ្លាតឡើយ។
សពឯកឧត្តមសាស្ត្រាចារ្យ ហេង តៃគ្រី ត្រូវបានតម្កល់ធ្វើបុណ្យទក្ខិណានុបទានតាមប្រពៃណី នៅផ្ទះលេខ៣១ ផ្លូវលេខ៧៥ សង្កាត់ស្រះចក ខណ្ឌដូនពេញ រាជធានីភ្នំពេញ៕
ប្រភព៖ នាយកដ្ឋានព័ត៌មាន
