នៅព្រឹកថ្ងៃទី ១៦ ខែធ្នូ ឆ្នាំ២០២៥ ឯកឧត្តម គី តិច ទេសរដ្ឋមន្ត្រីទទួលបន្ទុកបេសកកម្មពិសេស ប្រធានក្រុមមេធាវីរាជរដ្ឋាភិបាល និងជាប្រធានក្រុមមេធាវីស្ម័គ្រចិត្តសម្តេចតេជោសែន បានអញ្ជើញជួបសំដែងការគួរសមជាមួយ ឯកឧត្តម អ៊ុច បូររិទ្ធ អនុប្រធានទី១ ព្រឹទ្ធសភា នៅបន្ទប់ប្រជុំខុទ្ទកាល័យឯកឧត្តមអនុប្រធានទី១ និងក្នុងឱកាសនោះ ឯកឧត្តម គី តិច ក្នុងនាមក្រុមមេធាវីស្ម័គ្រចិត្តសម្តេចតេជោសែន និងក្រុមមេធាវីរាជរដ្ឋាភិបាល បានរួមចំណែកផ្តល់វិភាគទានស្ម័គ្រចិត្ត ចំនួន ២០.០០០ ដុល្លារអាម៉េរិក ជូន ឯកឧត្តម អនុប្រធានទី១ ព្រឹទ្ធសភា សម្រាប់ឧបត្ថម្ភដល់វីរកងទ័ពជួរមុខ និងបងប្អូនប្រជាជនភៀសសឹកពីអំពើឈ្លានពានរបស់ពួកល្មោភសង្គ្រាមសៀម មកលើបូរណភាពដែនដីមាតុភូមិកម្ពុជា។

ឯកឧត្តម អ៊ុច បូររិទ្ធ អនុប្រធានទី១ ព្រឹទ្ធសភា បានថ្លែងអំណរគុណដ៏ជ្រាលជ្រៅ ជូនចំពោះ ឯកឧត្តម គី តិច និងសមាជិក សមាជិកា ក្រុមមេធាវីរាជរដ្ឋាភិបាល និងក្រុមមេធាវីស្ម័គ្រចិត្តសម្តេចតេជោ ដែលបានរួមចំណែកផ្តល់វិភាគទានដ៏ថ្លៃថ្លានេះ សម្រាប់ឧបត្ថម្ភដល់វីរកងទ័ពកម្ពុជាដ៏អង់អាចក្លាហាន ដែលជាសាក្ខីភាព បង្ហាញពីទឹកចិត្តស្នេហាជាតិ សាមគ្គីឯកភាពជាធ្លុងមួយជុំវិញសម្តេចតេជោប្រធានព្រឹទ្ធសភា និងរាជរដ្ឋាភិបាលដែលមានសម្តេចធិបតីជាប្រមុខដឹកនាំ ប្រកបដោយបញ្ញាញាណ ក្នុងការការពារអធិបតេយ្យ ឯករាជ្យជាតិ និងបូរណភាពដែនដីកម្ពុជា។

ខ្លឹមសារ៖ ខុទ្ទកាល័យឯកឧត្តមអនុប្រធានទី១ព្រឹទ្ធសភា
រូបភាព៖ នាយកដ្ឋានព័ត៌មាន