នាព្រឹកថ្ងៃសុក្រ ១២កើត ខែមាឃ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៣០ ខែមករា ឆ្នាំ២០២៦ ឯកឧត្តមបណ្ឌិត ឈីវ យីស៊ាង នាយកខុទ្ទកាល័យសម្តេចតេជោ ហ៊ុន សែន ប្រធានព្រឹទ្ធសភា បានអញ្ជើញចូលរួមជាកិត្តិយស ផ្តល់បាឋកថា និងមតិបូកសរុប ក្នុងវគ្គបណ្តុះបណ្តាល ស្តីពីវិធីសាស្រ្តស្រាវជ្រាវ ការងារ និងការប្រើប្រាស់បច្ចេកវិទ្យាព័ត៌មាន-បញ្ញាសិប្បនិម្មិត ក្នុងការរៀបចំសុន្ទរកថា បទអន្តរាគមន៍ សេចក្តីថ្លែងការណ៍ និងសេចក្តីប្រកាសព័ត៌មាន។

វគ្គបណ្តុះបណ្តាលនេះ មានការចូលរួមពីសមាជិកខុទ្ទកាល័យសម្តេចប្រធានព្រឹទ្ធសភា សមាជិកខុទ្ទកាល័យអនុប្រធានទី១ ព្រឹទ្ធសភា និងមន្រ្តីរាជការនៃអគ្គលេខាធិការដ្ឋានព្រឹទ្ធសភា។

ក្នុងឱកាសនោះ ឯកឧត្តមបណ្ឌិត បានវាយតម្លៃខ្ពស់ចំពោះការខិតខំប្រឹងប្រែង និងការចូលរួមយ៉ាងសកម្មរបស់សិក្ខាកាម ដែលទទួលបានចំណេះដឹង និងជំនាញសំខាន់ៗ ក្នុងការសរសេរ និងការបញ្ចេញមតិសាធារណៈ ដោយយល់ដឹងច្បាស់អំពីរចនាសម្ព័ន្ធ ការរៀបចំគំនិត និងការសម្រិតសម្រាំងពាក្យឱ្យសមមស្រប។

ជាចុងក្រោយ ឯកឧត្តមបណ្ឌិត សង្ឃឹមថា សិក្ខាកាមនឹងយកចំណេះដឹងទាំងនេះទៅអនុវត្តក្នុងការងារជាក់ស្តែង បន្តអភិវឌ្ឍសមត្ថភាពសរសេរ និងនិយាយ ដើម្បីពង្រឹងប្រសិទ្ធភាពនៃការប្រាស្រ័យទាក់ទង ជាគុណប្រយោជន៍ដល់ការបម្រើថ្នាក់ដឹកនាំ និងស្ថាប័នព្រឹទ្ធសភា។

វគ្គបណ្តុះបណ្តាលនេះ រៀបចំឡើងដោយអគ្គលេខាធិការដ្ឋានព្រឹទ្ធសភា នៅវិមានព្រឹទ្ធសភា។

ខ្លឹមសារ៖ ខុទ្ទកាល័យសម្តេចតេជោប្រធានព្រឹទ្ធសភា
រូបភាព៖ នាយកដ្ឋានព័ត៌មាន