ក្នុងពិធីណេះសំណាលជាមួយសមាជិកក្រុមប្រឹក្សាសង្កាត់ អាជ្ញាធរមូលដ្ឋាន និងអ្នកពាក់ព័ន្ធសរុបចំនួន៧៥នាក់ មកពីសង្កាត់ទាំង៥ នៃខណ្ឌចំការមន រាជធានីភ្នំពេញ នារសៀលថ្ងៃទី២៩ ខែមករា ឆ្នាំ២០២៦ នៅវិមានព្រឹទ្ធសភា ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគទី១(រាជធានីភ្នំពេញ) បានផ្ដល់យោបល់ឱ្យអាជ្ញាធរខណ្ឌនិងសង្កាត់ បន្តជំរុញនិងបង្កភាពងាយស្រួលដល់វិស័យទេសចរណ៍ ជាពិសេសអាជីវកម្មខ្នាតតូចនៅក្នុងមូលដ្ឋានរបស់ខ្លួន ជាមួយនឹងការពង្រឹងសណ្តាប់ធ្នាប់សាធារណៈ ថែរក្សាសោភណភាពតាមដងផ្លូវ និងលុបបំបាត់ការឆបោកតាមអនឡាញជាដើម។

ឯកឧត្តមបណ្ឌិត បានលើកឡើងថា ខណ្ឌចំការមន គឺជាតំបន់ទេសចរណ៍ដ៏ពេញនិយមរបស់ជនបរទេសមកកម្សាន្តនិងចូលចិត្តរស់នៅច្រើន ដោយសារតម្លៃអាហារនិងការស្នាក់នៅសមរ្យ និងមានភាពសម្បូរបែបនៃផ្សារទួលទំពូង ផ្សារទំនើបអ៊ីអន និងអាហារដ្ឋានចម្រុះជាតិសាសន៍។

នៅចុងបញ្ចប់កម្មវិធី ឯកឧត្តមបណ្ឌិត បានផ្តាំផ្ញើដល់សមាជិកក្រុមប្រឹក្សាសង្កាត់ និងអ្នកចូលរួម បន្តយកចិត្តទុកដាក់ តាមដាន និងអនុវត្តនូវការសន្យា ដែលសមាជិកក្រុមប្រឹក្សាសង្កាត់បានសន្យានាអំឡុងពេលបោះឆ្នោតកន្លងមក។

ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន