នាព្រឹកថ្ងៃពុធ ៥រោច ខែចេត្រ ឆ្នាំកុរ ឯកស័ក ព.ស២៥៦២ ត្រូវនឹងថ្ងៃទី២៤ ខែមេសា ឆ្នាំ២០១៩ ឯកឧត្តម កែវ ចាន់ណា អគ្គនាយកព័ត៌មាន និងទំនាក់ទំនងសាធារណៈ បានអញ្ជើញជាអធិបតីភាពក្នុងពិធីបើកវគ្គបណ្តុះបណ្តាលស្តីពី ការគ្រប់គ្រងទ្រព្យសម្បត្តិរដ្ឋ និងការគ្រ​ប់គ្រងសន្និធិ ជូនដល់ថ្នាក់ដឹកនាំ និងមន្ត្រីរាជការ នៃអគ្គលេខាធិការដ្ឋានព្រឹទ្ធសភាចំនួន ៩៨នាក់ នៅសណ្ឋាគារ Apsara Angkor Resort and Conference ខេត្តសៀមរាប។

វគ្គបណ្តុះបណ្តាលប្រព្រឹត្តទៅរយៈពេល ២ថ្ងៃ ចាប់ពីថ្ងៃទី២៤ ដល់ថ្ងៃទី២៥ ខែមេសា ឆ្នាំ២០១៩ ក្នុងគោលបំណងដើម្បីបញ្ជ្រាបការយល់ដឹង ពង្រឹងសមត្ថភាព និងលើកកម្ពស់សម្ថភាព របស់មន្ត្រីរាជការ នៃអគ្គលេខាធិការដ្ឋានព្រឹទ្ធសភា ជាពិសេសចំពោះមន្ត្រីអនុវត្តផ្ទាល់លើការងារគ្រប់គ្រងទ្រព្យសម្បត្តិរដ្ឋ។

វគ្គបណ្តុះបណ្តាលនេះ នឹងផ្តល់ឱ្យសិក្ខាកាមទទួលបាននូវចំណេះដឹងអំពី៖

– បទប្បញ្ញាត្តិ នៃការគ្រប់គ្រងទ្រព្យសម្បត្តិរដ្ឋ

– សារៈប្រយោជន៍ នៃការគ្រប់គ្រងទ្រព្យសម្បត្តិរដ្ឋ

– វិធាន និងនីតិវិធី នៃការគ្រប់គ្រងទ្រព្យសម្បត្តិរដ្ឋ

– ការរៀបចំបញ្ជីសារពើភ័ណ្ឌទ្រព្យសម្បត្តិរដ្ឋ

– ការគ្រប់គ្រង តាមដាន ត្រួតពិនិត្យ វាយតម្លៃ និងការថែទាំទ្រព្យសម្បត្តិរដ្ឋ

– ប្រព័ន្ធព័ត៌មានវិទ្យាសម្រាប់គ្រប់គ្រងទ្រព្យសម្បត្តិរដ្ឋ

– ការគ្រប់គ្រងទ្រព្យសម្បត្តិរដ្ឋ ក្រោមវិធីកែទម្រង់ការគ្រប់គ្រងទ្រព្យសម្បត្តិរដ្ឋ៕