នារសៀលថ្ងៃព្រហស្បតិ៍ ១៣រោច ខែទុតិយាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៩ ខែសីហា ឆ្នាំ២០១៨ នៅសាលប្រជុំអគារក្រហម វិមានព្រឹទ្ធសភា ស្លាបខាងស្តាំ ឯកឧត្តម ឡោក ឆាយ អគ្គលេខាធិការព្រឹទ្ធសភាស្តីទី បានទទួលជួបពិភាក្សាការងារជាមួយនឹងឯកឧត្តមបណ្ឌិត សួន វ៉ានី នាយករងសាលាភូមិន្ទរដ្ឋបាល ដើម្បីសហការជាមួយសាលាភូមិន្ទរដ្ឋបាល រៀបចំបើកវគ្គបណ្តុះបណ្តាលជូនមន្ត្រីរាជការនៃអគ្គលេខាធិការដ្ឋានព្រឹទ្ធសភា នៅសាលាភូមិន្ទរដ្ឋបាល។
វគ្គបណ្តុះបណ្តាលដែលគ្រោងនឹងរៀបចំ រួមមាន៖ ទី១-គោលនយោបាយកំណែទម្រង់ច្បាប់ និងប្រព័ន្ធតុលាការ ទី២-ការតាក់តែងច្បាប់ គោលនយោបាយ និងលិខិតបទដ្ឋាន ទី៣-ប្រព័ន្ធនយោបាយ និងរដ្ឋបាល ទី៤-ប្រព័ន្ធនីតិអាស៊ាន ទី៥-គ្រប់គ្រងអង្គភាពសាធារណៈ ទី៦-ការដោះស្រាយវិវាទរដ្ឋបាល និងទី៧-នវានុវត្តន៍ក្នុងរដ្ឋបាលសាធារណៈ។
