នាព្រឹកថ្ងៃពុធ ២ កើត ខែជេស្ឋ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៨ ខែឧសភា ឆ្នាំ២០២៥ វេលាម៉ោង០៩៖០០ ឯកឧត្ដមបណ្ឌិត ចែម វីឌ្យ៉ា ប្រធានគណៈកម្មការកិច្ចការបរទេស សហប្រតិបត្តិការអន្ដរជាតិ និងព័ត៌មាន បានអញ្ជើញផ្ដល់បាឋកថា ស្ដីពី គោលនយោបាយការបរទេស និងវិស័យការទូត តបតាមសេចក្ដីអញ្ជើញរបស់ ឯកឧត្ដមសាស្ដ្រាចារ្យបណ្ឌិត ហោ ប៉េង សាកលវិទ្យាធិការ នៃសាកលវិទ្យាល័យជាតិគ្រប់គ្រង។
នៅក្នុងកិច្ចថ្លែងបាឋកថានេះ ឯកឧត្ដមសាស្ដ្រាចារ្យបណ្ឌិត បានឡើងមានមតិស្ថាគមន៍ ជម្រាបអំពីសាវតា និងកិច្ចអភិវឌ្ឍន៍របស់សកលវិទ្យាល័យជូនគណៈអធិបតី និងអង្គពិធី។ បន្ទាប់មកទៀត ឯកឧត្ដមបណ្ឌិតប្រធានគណៈកម្មការ បានចាប់ផ្ដើមដោយការបកស្រាយអំពីបរិបទប្រវត្តិសាស្ត្រ ដំណើរការនៃកិច្ចព្រមព្រៀងសន្តិភាពទាំងឡាយ និងវឌ្ឍនភាពការងារការទូតរបស់ព្រឹទ្ធសភានៃព្រះរាជាណាចក្រកម្ពុជា នីតិកាលទី៥ ក្រោមការដឹកនាំដ៏ខ្ពង់ខ្ពស់បំផុត ប្រកបដោយភាពឈ្លាសវៃ ស្វាហាប់ និងកិត្តិបណ្ឌិតរបស់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា។ ជាកិច្ចបញ្ចប់ ឯកឧត្ដមបណ្ឌិត ចែម វីឌ្យ៉ា បានធ្វើការចែករំលែកអំពីការងារការទូត និងភាពជាអ្នកដឹកនាំ ដោយផ្អែកលើបទពិសោធន៍ការងារក្នុងវិស័យការទូតដ៏ឧត្ដុង្គឧត្ដមជាច្រើនឆ្នាំ។
កម្មវិធីធ្វើបទបឋកថានេះបានប្រារព្វឡើងនៅ នៅសាកលវិទ្យាល័យជាតិគ្រប់គ្រង ដែលមានការចូលរួមពីសាស្ដ្រាចារ្យ និងសិស្សនិស្សិតប្រមាណ២៥០នាក់។
