នារសៀលថ្ងៃទី៧ ខែកក្កដា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា បានដឹកនាំកិច្ចប្រជុំប្រចាំខែជាមួយប្រធានគណៈកម្មការទាំង១០ នៃព្រឹទ្ធសភា, ប្រធានក្រុមសមាជិកព្រឹទ្ធសភាប្រចាំភូមិភាគទាំង៨, ប្រធានក្រុមសមាជិកា និងប្រធានគណៈកម្មការក្រមសីលធម៌សភារបស់សមាជិកព្រឹទ្ធសភា ដោយពិភាក្សាលើរបៀវារៈចំនួន២៖ ទី១. ការប្រមូលទិន្នន័យ និងការសិក្សាពីប្រសិទ្ធភាពការងាររបស់សមាជិកក្រុមប្រឹក្សាឃុំ-សង្កាត់ នៅតាមភូមិភាគទាំង៨ និងទី២. ប្រមូលទិន្នន័យ និងសិក្សាត្រូវកែ ឬធ្វើសេចក្តីស្នើច្បាប់អ្វីខ្លះឆ្ពោះទៅឆ្នាំ២០៥០ នៅសាលប្រជុំពិសេស៣ ព្រឹទ្ធសភា។
អង្គប្រជុំបានពិភាក្សា និងលើកឡើងអំពីស្ថានភាពរបស់មូលដ្ឋាន និងការរួមចំណែករបស់សមាជិកព្រឹទ្ធសភា ក្នុងការជួយដោះស្រាយបញ្ហា និងសំណូមពររបស់មូលដ្ឋាន ព្រមទាំងសមិទ្ធផលដែលសម្រេចបានកន្លងមក។ ទន្ទឹមនោះដែរ ឯកឧត្តមបណ្ឌិត បានលើកឡើងថា ដើម្បីពង្រឹងគណនេយ្យភាព និងប្រសិទ្ធភាព គឺត្រូវធ្វើការឱ្យបានកៀកកិតនិងស្និទ្ធស្នាលជាមួយមូលដ្ឋាន ដោយមានការកត់ត្រា ជំរុញ និងលើកទឹកចិត្តក្រុមប្រឹក្សាឃុំ សង្កាត់ ឱ្យចេះប្រើអាទិភាពក្នុងការដោះស្រាយបញ្ហាប្រឈម និងសំណូមពររបស់បងប្អូនប្រជាពលរដ្ឋនៅតាមមូលដ្ឋានរបស់ខ្លួន។
នៅចុងបញ្ចប់នៃអង្គប្រជុំ ឯកឧត្ដមបណ្ឌិត បានបញ្ជាក់លើសារៈសំខាន់២គឺ ទី១-ស្វែងរកព័ត៌មានដើម្បីពង្រឹងសមត្ថភាពរបស់សមាជិកក្រុមប្រឹក្សាឃុំ សង្កាត់ ដែលជាអង្គបោះឆ្នោត សម្រាប់ផលប្រយោជន៍មូលដ្ឋានរបស់ពួកគាត់ និងទី២-រួមគំនិតគ្នាដើម្បីរៀបចំវេទិកាអន្តរជាតិ ដោយសូមឱ្យគណៈកម្មការនីមួយៗពិចារណាក្នុងការរកប្រធានបទល្អៗ និងដៃគូគាំទ្រ។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
