នាថ្ងៃទី១៦ ខែកក្កដា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា និងឯកឧត្តមបណ្ឌិត សាយ សំអាល ឧបនាយករដ្ឋមន្រ្ដី រដ្ឋមន្រ្ដីក្រសួងរៀបចំដែនដី នគរូបនីយមក្ម និងសំណង់ បានអញ្ជើញជាអធិបតីក្នុងពិធីចែកវិញ្ញាបនបត្រសម្គាល់អចលនវត្ថុតាមគោលការណ៍ ប្រទានកម្មរបស់រាជរដ្ឋាភិបាល ជូនវិទ្យាស្ថានជាតិកសិកម្មព្រែកលាប និងប្រជាពលរដ្ឋ ៥១គ្រួសារ ក្នុងសហគមន៍ព្រែកខ្វិត ស្ថិតក្នុងភូមិព្រែកលៀប សង្កាត់ព្រែកលៀប ខណ្ឌជ្រោយចង្វារ។
ឯកឧត្តមបណ្ឌិត ធន់ វឌ្ឍនា បានអបអរសាទរដល់បងប្អូនប្រជាពលរដ្ឋទាំង៥១គ្រួសារ និងវិទ្យាស្ថានជាតិកសកម្មព្រែកលៀប ដែលទទួលបានបណ្ណនាពេលនេះ។ ឯកឧត្តម ក៏បានលើក និងពន្យល់អំពីការធ្វើវិសោធនកម្មរដ្ឋធម្មនុញ្ញមាត្រា៣៣ ដែលបញ្ញត្តិអំពីការទទួលសញ្ជាតិខ្មែរ និងការបាត់សញ្ជាតិខ្មែរ ដោយរួមទាំងការដកសញ្ជាតិខ្មែរ ត្រូវកំណត់ក្នុងច្បាប់ ដែលច្បាប់នេះ គឺអនុវត្តចំពោះបុគ្គល ដែលក្បត់ជាតិតែប៉ុណ្ណោះ ដូចនេះសូមបងប្អូនកុំមានការព្រួយបារម្ភ ហើយការធ្វើច្បាប់ ត្រូវបានឆ្លងកាត់ការពិភាក្សាយ៉ាងល្អិតល្អន់ ទាំងផ្នែកបច្ចេកទេស និងនយោបាយ។
ជាចុងបញ្ជប់ ឯកឧត្តមបណ្ឌិត បានផ្តាំផ្ញើឱ្យបងបងប្អូន បន្តរស់នៅជាសហគមន៍ ចូលរួមថែរក្សាអនាម័យ បរិស្ថាន និងត្រូវរស់នៅប្រកបដោយភាតរភាពនឹងគ្នា។
សូមបញ្ជាក់ជូនថា៖ ក្នុងមូលដ្ឋានរាជធានីភ្នំពេញ មានក្បាលដីប៉ាន់ស្មាន ចំនួន៤៧៧ ២៩៩ក្បាលដី ហើយទទួលបានការវាស់វែងរួច មានចំនួន៤៦៥ ៩១៩ក្បាលដី ដោយក្នុងនោះបានបញ្ជូននិងគូសក្បាលដីរួចចំនួន៤៦២ ៤៣៤ក្បាលដី និងបានចេញបណ្ណរួចចំនួន៣៣៧ ១៨៤បណ្ណ ដោយក្នុងនោះបណ្ណចំនួន៣០៤ ៩៩៣បណ្ណ។
ជាលទ្ធផលក្នុងចំណោមខណ្ឌទាំង១៤ ក្នុងរាជធានីភ្នំពេញ មានខណ្ឌចំនួន១៣ បានវាស់វែង និងចែកបណ្ណរួចចប់សព្វគ្រប់ ដោយឡែកនៅខណ្ឌ៧មករា មិនទាន់មានការចុះបញ្ជីជាលក្ខណៈប្រព័ន្ធនៅឡើយ មានតែការចុះបញ្ជីដាចដោយដុំ និងកម្មសិទ្ធផ្ទះ។
ប្រភព៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
