នាព្រឹកថ្ងៃទី២១ ខែមករា ឆ្នាំ២០២២ ឯកឧត្ដមកិត្តិសង្គហបណ្ឌិត ទេព ងន អនុប្រធានទី២ព្រឹទ្ធសភា ព្រឹទ្ធសភានៃព្រះរាជាណាចក្រកម្ពុជា បានអញ្ជើញជាអធិបតីភាពក្នុងពិធីចុះហត្ថលេខាលើអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការស្រាវជ្រាវ និងបណ្តុះបណ្តាលធនធានមនុស្សរវាងអគ្គលេខាធិការដ្ឋានព្រឹទ្ធសភា និងរាជបណ្ឌិត្យសភាកម្ពុជា នៅសាលសិក្ខាសាលាបណ្ណាល័យព្រឹទ្ធសភា។ អនុស្សរណៈនៃការយោគយល់គ្នានេះ ត្រូវបានចុះហត្ថលេខាដោយឯកឧត្តម អ៊ុ សារឹទ្ធ អគ្គលេខាធិការព្រឹទ្ធសភា និងឯកឧត្តម សុខ ទូច ប្រធានរាជបណ្ឌិត្យសភាកម្ពុជា ដើម្បីអនុវត្តសកម្មភាពរួមគ្នា ដែលមានជាអាទិ៍ដូចជា៖ ១.សហការរៀបចំ និងគ្រប់គ្រងវគ្គបណ្តុះបណ្តាល សិក្ខាសាលា និងឬពិធីជួបប្រជុំនានាដែលពាក់ព័ន្ធ។ ២.ចែករំលែកគ្នានូវព័ត៌មានពាក់ព័ន្ធ ទិន្នន័យស្រាវជ្រាវ និងឯកសារស្រាវជ្រាវ។ ៣.រៀបចំការសិក្សាស្រាវជ្រាវរួមគ្នា លើប្រធានបទពាក់ព័ន្ធដែលបានឯកភាពគ្នា។
